Afandi muxbirligida maqola ketidan maqola yoza berar edi. Bir o`rtog`i unga bunday dedi:
— Shu yozayotgan maqolalaring qatori onanga ham bitta xat yozsang bo`lmaydimi?
— Gonorarini kim beradi? - so`radi Afandi.

O`rtoqlaridan biri Afandini uyga taklif qildi. U mehmonxonaning to`rida o`tirgan edi, eshon kirib keldi.
— Qani, taqsir, buyoqqa o`tsinlar, - deb, unga o`z joyini bo`shatib berdi.
Imom domla kirib keldi. Unga ham joy bo`shatib, o`zi sal pastroqqa o`tirdi.
Keyin ellikboshi, birmuncha boyonlar kirib kelishdi. Afandi:
— Qani yuqoriga, yuqoriga, - deb, ularni ham to`rga o`tqizvordi.
Bundoq qarasa, o`zi poygakka tushib qolipti. Afandining diqqati oshib turgan edi, eshikdan bir ko`ppak it mo`raladi. Ikkala qulog`idan cho`zib uni ham ichkariga tortdi-da:
— Bor, sen ham to`rga chiq! - dedi.

Afandi bir o`rtogi bilan yotar edi, o`rtog`i uyg`onib Afandidan so`radi:
— Afandi, uyg`oqmisiz?
— Ha, nima qildi?,
— Sizdan bir oz pul so`ramoqchi edim.
— Unday bo`lsa men uxlayapman,— dedi Afandi.

Bir kuni Afandinikiga yon qo`shnisi kirib qolibdi. Afandi:
— E, keling, keling qo`shni.
Qo`shni:
— Keldik qo`shni.
— Tinchlikmi o`zi? Kecha tunda "gurs-s-s" etgan ovoz eshitildi.
Afandi:
— Ha umi kecha tomda yotgandim, choponim pastga tushib ketdi.
Qo`shni:
— E, qo`ying-e, chopon tushib ketsa bunchalik ovoz chiqmaydi-ku.
Afandi:
— Gap shundaki, shu choponning ichida o`zim ham bor edim-da, - dermish.

Afandi kimsasiz cho`lda faqat xotini ikkalasi yashar ekanlar. Taqdir taqozasi bilan xotini tug`adigan bo`lib qolibdi. Kimsasiz cho`l, qorong`i tunda, naqd ming chakirim naridan bitta doya kampirni topib kelibdi.
Doya kampir ham Afandining uyida o`zidan boshqa hech kim bo`lmaganligi sababli qorong`ida chiroqni qaratib turasan, - deb chiroqni unga tutkazibdi.
Afandi chiroqni qaratib turganmish, doya kampir tug`dirayotganmish. Afandi chiroqni qaratib tursa, oldin bitta kalla chiqibdi, keyin ikkinchisi va uchinchi kalla ham ko`rinayotganmish. Afandi shosha-pisha chiroqni "puf", deb o`chiribdi.
Doya kampir hayron bo`lib:
— Afandi, chiroqni nimaga o`chirding, - deb so`rabdi.
Afandi norozi bulib:
— E-e-e, onasini emsin. Chiroq qaratib tursang, bular yorug`ga qarab chiqaverarkan, - dermish.

Bir kuni Afandi uyida o`tirgan ekan. Sigaret chekish uchun gugurt yoqmoqchi bo`libdi. Qarasa bir dona gugurt qolibdi.
Shu payt svet o`chib qolibdi. Shunda Afandi haligi gugurt donasi bilan sham yoqibdi va shamni ko`tarib qo`shnisinikiga sigaret tutatgani chiqibdi.

Bir kuni Afandi yo`lda ketayotsa svetoforda bir o`ta zamonaviy qiz mashinasi bilan kelib to`xtabdi
Afandi ko`rib:
— Voy-bo`, buncha chiroyli. Bunaqasini hali ko`rmagandim, - desa
Haligi qiz:
— Ma’lumot uchun, meni onam shunaqa chiroyli tuqqanlar, onam ham juda go`zal ayollar, - desa
Afandi:
— Sen onasini qayerdan bilasan? Bu chet elda ishlab chiqarilgan mashina-ku, - dermish

Afandi bir kecha sham yoqib xotini bilan gaplashib o`tirgan edi, birdan shamol turib, shamni o`chirdi. Uy qop-qorong`i bo`lib qoldi.
— Chap tarafingizda gugurt bor, olib shamni yoqib yuboring,—dedi xotini.
— Iye, qiziqmisan, xotin? Qorong`ida chap tarafni qayoqdan bilib bo`ladi, deysan!

Bir kuni Afandi uch-to`rtta o`rtog`ini uyiga boshlab keldi. Xotiniga kirib: «Bir quling o`rgilsin palov qilgin» dedi.
— Voy, qiziqmisiz? Axir uyimizda na guruch bor, na go`sht, na yog` bor. Nima bor, nima yo`qligini surushtirmay-netmay, mehmon boshlab kelaverasizmi?!
— Xo`p-xo`p xotin, sal o`pkangni bosib ol. Hech bo`lmasa, dasturxonga bo`sh laganni olib chiqib qo`ygin, o`zim gapning kiftini keltiraman.
Xotini ham eri aytganday qilib, bo`sh laganni dasturxonga olib chiqib qo`ydi.
— Og`aynilar,— dedi Afandi,— Agar uyimizda guruch, yog`, go`sht bo`lganida edi, hozir shu bo`sh laganda bug`i chiqib turgan palov bo`lardi...

Afandi bog`ida o`tin qilib, kechqurun boltasini yelkasiga tashlab ketayotgan edi, yo`lda bir hovlidan it chiqib, Afandiga tashlandi. Afandi bolta bilan itni chopib o`ldirdi. Itning egasi chiqib Afandini tutdi:
— It sizni talagan ekan, boltaning sopi bilan urib haydasangiz ham bo`lar edi-ku!
— It dumi bilan qopsa, boltaning sopi bilan urar edim, beti bilan qopgandan keyin, men ham boltaning beti bilan chopdim-da! O`zidan ko`rsin!